Dashuritë verore, disa arsye pse nuk u duhet thënë “jo”!

Ato janë të mira për vetëvlerësimin, humorin dhe madje edhe shëndetin (me pak kujdes). Janë shumë bukura, edhe pse nuk zgjasin

Vera është stina e dashurive. Të paharrueshme, intensive, të pasionuara, edhe pse zakonisht nuk janë të destinuara të mbijetojnë më shumë sesa fundi i pushimeve. Por ndoshta janë të bukura pikërisht për këtë arsye. Prandaj, nëse i jetojmë në mënyrën e duhur dhe i menaxhojmë siç duhet, ata janë një përvojë për të cilën nuk duhet të themi jo. Mjafton t’i lini të ikin dhe t’i jetoni pa shumë pritshmëri (por me disa masa paraprake).

Një ilaç për vetëvlerësimin – Të ndihesh e dëshiruar është gjithnjë një ndjesi e bukur. Kjo na bën të ndihemi të bukur, na ndihmon të kemi besim në vetvete (ose për ta rigjetur atë), kjo na bën të dëshirojmë të kujdesemi për pamjen tonë më me kujdes sesa zakonisht. Dhe pastaj, a dëshironi të provoni përsëri ndjesinë fantastike të “fluturave në stomak”që me shumë gjasa e kishit harruar?

Shfrytëzoni momentin – Nuk është e thënë që një histori për t’ju bërë të lumtur duhet të zgjasë përgjithmonë: një flirt veror shpesh nuk zgjat më shumë sesa fundi i pushimeve. Dhe në fund të fundit e bukura qëndron pikërisht këtu. Gjëja e rëndësishme është që të jeni të vetëdijshëm për këtë dhe të mos keni pritshmëri të ekzagjeruara: është e vërtetë se shumë çifte të qëndrueshme e kanë filluar lidhjen e tyre gjatë pushimeve, por jetëgjatësia e këtyre flirteve të vogla nuk është një standard. Kështu që fjala e duhur është shfrytëzoni momentin, pa menduar shumë se ç’do të ndodhë. Nëse jeni në kërkim të një lidhjeje të rëndësishme ose që do të zgjasë përgjithmonë, më mirë lërini fare dashuritë e verës; rreziku që do të zhgënjeheni dhe do të lëndoheni është shumë i lartë.

Objektivat – Një lidhje ose një flirt është mënyra më e mirë për të kaluar çaste të bukura së bashku, mbrëmje ose net në argëtim të plotë, të shkoni në darkë, të kërceni dhe, pse jo, të bëni dashuri. Ndoshta është pikërisht e kundërta e asaj se si zakonisht jetojmë: është rasti të mos humbasim mundësinë për t’u mbushur me energji pozitive, duke harruar shqetësimet e përditshme, madje edhe depresionin dhe melankolinë që ju kap ndonjëherë, veçanërisht nëse jeni single. Le të pajtohemi me këtë gjendje shpirtërore dhe të mos përfshihemi në biseda shumë të thella dhe të vështira: për shembull, shmangim të hyjmë në detajet e vështirësive tona në punë, problemet familjare ose ndonjë marrëdhënie dashurie që sapo ka përfunduar dhe na ka lënduar. Shumë më mirë ta vëmë “jetën në pauzë”dhe të marrim çdo mundësi për të shpëtuar: ne do të rimarrim energjitë tona më të mira dhe do t’i shijojmë në maksimum pushimet.

Pasioni në maksimum ose dashuri platonike – Një nga gjërat më të bukura të një flirti veror është zbulimi i personit me të cilin kemi krijuar lidhje. Ne mund të takojmë një djalë të pasionuar, i cili duket fantastik në mbrëmje dhe na argëton deri në orët e hershme, dhe pastaj në mëngjes, ai tregon fytyrën e tij të vërtetë dhe na bën t’ia mbathim; ose mund të dashurohemi me një person që nuk do të heqë dorë nga ne dhe do të na duhet shumë punë të çlirohemi nga ai; ose mund të jetojmë një dashuri platonike, e cila nuk mund të shkojë përtej fazës së netëve të gjata të kaluara duke folur së bashku dhe që do të na lërë me krimbën e asaj që mund të kishte qenë atje, po të ishim më shumë iniciator. Sidoqoftë, çdo histori do të na lërë një kujtim: edhe ne duhet ta mbajmë si një kujtim të bukur. Në fund të fundit, është fakt: dashuritë verore jetojnë më shumë në kujtesë sesa në realitet.

Por kujdes… – Dashuritë verore mund të na japin edhe dhurata të pakëndshme , të cilat mund të jenë edhe me pasoja serioze. Kthimi nga pushimet është një nga periudhat e vitit, në të cilin ka një rritje të konsiderueshme të infeksioneve seksualisht të transmetueshme dhe madje edhe të shtatëzanive të padëshiruara. Le të kujtojmë gjithmonë që të marrim të gjitha masat e nevojshme, sepse shëndeti dhe parandalimi … nuk shkojnë në pushime.

Po nëse zgjat? – Thuhet se një flirt veror nuk mund të zgjasë përtej pushimeve. Nëse ndiheni shumë të përfshirë në kohën e nisjes, nëse ideja e ndarjes është e padurueshme për të dy dhe nëse distancat nuk janë shumë të mëdha, mund të përpiqeni të vazhdoni marrëdhënien. Edhe një herë, gjëja e rëndësishme nuk është të ushqeni shumë pritshmëri: duke parë njëri-tjetrin në qytet, midis një angazhimi pune dhe tjetrit, në stresin e jetës së përditshme mund të rezervojmë shumë surpriza dhe do të zbulojmë anë të tjera të karakterit që nuk i imagjinonim. Megjithatë, gjithnjë ia vlen të provohet. Le të provojmë të ndajmë projekte, të krahasojmë vizionin tonë të jetës dhe pritjet tona: le të kryqëzojmë gishtat dhe të shohim se çfarë do të ndodhë.

13 korrik 2018 (gazeta-Shqip.com)

Source: Ndryshe